Dokter Jon tersenyum. Tapi, manulak sacaro haluih. Ditulak sacaro haluih, Hendrik ko poak e manjadi pulo.
”Dok, ciek duo kawan ambo adoh lo dokter mah. Lai kenal pak dokter jo dokter Joan, inyo kapalo dokter di Siloam Hospitals Kabun Jaruak Jakarta. Dokter Joan ko, iko jo ambo mah,” kacek Hendrik sambia marapek an tunjuak jo jari tangahnyo. Mandanga kato Hendrik, dokter Jon senyum se nyo. Sudah tu inyo mintak permisi. ”Permisi yo....”. Hendrik talongo. Jambri mangango.
Dokter Jon, Syafri dan Rundi. Batigo urang ka bajalan. Manyusuri ruang langang. Tapak kaki urang ko jaleh tadanga. Baitu bana sunyinyo ruang manuju tampek Yanti dirawat.
Batamu ciek duo jo urang, wajah-wajah urang rumah sakik ko, wajah-wajah panuah rusuah, tagang, cameh jo gamang.
Baitu pintu ruang di bukak dek dokter Jon, Yanti tampak takapa. Muncuang lah baselang. Hiduang baselang. Mato tak jalang-jalang. Handeh, sabana tahibo Rundi mamandang urang nan disayang dalam sakik nan maarang-arang.
Indak bisa Rundi bakato. Cayia perasaannyo mancaliak urang nan sangaik dicintoi kini dalam daro darito. Samantaro Syafri bantuaknyo lah galisah pulo untuak ka pulang. Hari lah mulai malam. Rundi mangarati.
”Syafri, kalau ka pulang dulu ka Bukiktinggi, indak ba-a doh. Pasan se teksi ka bukik dih,” kato Rundi ka Syafri.
”Kalau ba itu kato kawan ba-a juo lai,” jawek Syafri sambia lansuang mamasan teksi.
”Soalnyo, ambo bisuak adoh pulo urusan lain,” kato Syafri.
Sapaningga Syafri, dokter Jon tampak bacarito serius jo Rundi. Manuruik dokter Jon, Yanti bisa mandapek panyakik amnesia dek karano trauma di kapalo akibaik benturan sangaik kancang manimpo kapalonyo.
”Tapi, mudah-mudahan iko indak tajadi,” kato dokter Jon sambia mamandang wajah Yanti nan masih alun sadar sapanuahnyo. Rundi mamintak ka dokter Jon untuk maagiah perawatan terbaik untuk Yanti.
”Tolong ambo yo Jon. Tolong agiah Yanti perhatian khusus, perawatan ekstrapenanganan medis. Mintak tolong ambo. Mambana ambo. Bara pun biayanyo, ambo tangguang Jon....,” pintak Rundi pulo.
Indak lamo sudah tu, Jon mintak pamit ka Rundi. Karano ka malakukan operasi untuak pasien nan lain. Samantaro, Rundi labiah mamiliah, tatap barado dakek ruang tu. Rundi mamiliah manunggu di koridor mungko ruang tu. Inyo indak ingin jauh-jauh dari Yanti.
Sampai pagi, Rundi tak lalok. Inyo tagak duduak, tagak duduak se karajonyo di muko kamar Yanti. Rundi lupo, bahaso inyo punyo Ijah di Bukiktinggi. Indak pulo tatelpon dek inyo Ijah doh.
Samantaro, Ijah manunggu Rundi jo hati nan gelisah pulo dek karano lakinyo indak pulang malam tadi. Adoh keinginan Ijah untuak manelpon Rundi. Tapi keinginan tu indak inyo laksanakan dek karano, inyo indak biaso mananyokan di mano laki barado.
Tapi kini ko, sungguah, hati Ijah iyo sabana-bana batanyo. Lakinyo di ma kini. Sadang manga kini. Sadang jo sia kini. Indak biasonyo pertanyaan takah iko muncul dalam pangan jo bilik hatinyo. Indak biasonyo doh. Mungkin iko nan dinamokan jo naluri seorang bini.
Samantaro manjalang siang, di Gunuangpangilun urang sibuk untuak malakukan persiapan panguburan Didit. Rundi sangajo indak datang ka panguburan Didit dek karano inyo ingin manjago Yanti. Iko pun sasuai jo permintaan Jambri ka inyo, sabalun pulang ka Gunuangpangilun untuak ikuik mampasiapkan pamakaman untuak Didit.
”Rundi, tolong jago Yanti. Indak usah lah Rundi ka Gunuangpangilun. Di siko sajolah,” kato Jambri ka Rundi sabalun baliak ka Gunuangpangilun.
Rundi haniang. Rundi hanok. Rundi diam. Rundi tasadu. Rundi tasadiah. Sabananyo, di hati keteknyo nan lain, inyo ingin mahantakan Didit sampai ka peristirahatan penghabisan tu. Tapi ba-a lah....
Ba-a keadaan di Gunuangpangilun kini ko? Ba-a keadaan Pak Ridwan? Di ma Didit kadikubuakan lah jaleh tampeknyo. Tapek bana di kapalo unto Gunuangpangilun. Tinggi tampeknyo. Tampak rancak pamandangan Kota Padang dari ateh ko. Indak jauh dari ”tampaik”. Tampaik ko tampek urang lamo mamutuih kaji.
Lapeh Zuhur Didit dikubuakan. Rencana, Didit disumbahyangkan di Musajik Nurul Islam.
Walau banyak urang malarang Pak Ridwan mahangkek tandu, tapi inyo basikareh juo mahangkek tandu dan mamacik gagang nan di muko.
Tapi apo awak tahu, dado jo hati Pak Ridwan tu sakik jo padiah. Dadonyo sakik dek ulah, urek jalan jantuang nan sampik jo makin manyampik. Hatinyo padiah dek karano kahilangan cucu satu-satunyo.
Katikok mahangkek tandu dari rumah ka musajik, sabananyo Pak Ridwan sadang bataruang pulo jo raso sakik sabana sakik. Tapi, inyo tatap juo bausaho untuak tagak. Nyo ganggam kareh-kareh pangka pahangkek tandu tu takah nyo mangganggam tangan cucu nannyo sayang.
Makin kareh paciknyo, makin bakunang-kunang incek matonyo. Ndak adoh urang nan tahu doh, bahaso Pak Ridwan bagai badan indak raso jo badan, bagai nyao indak raso di rago. Lah mulai malayang-layang tiado rupo.
Tujuah langkah ampiang ka tibo di muko musajik, Pak Ridwan rabah. Urang tapakiak. Ampiang karando tasoleang. Urang heboh. Pak Ridwan takapa di halaman musajik nan babeton tu.
Pakiak histeris manjadi-jadi. Tautamo amak-amak. Tautamo Uwo Bina. Luluang e...mambuek urang makin panik. Karando di latak an elok-elok ka halaman musajik nan babeton tu.
Babarapo urang mahangkek Pak Ridwan. Pak Ridwan diosong talabiah dahulu ka dalam musajik. Sudah tu baru karando dibaok pulo ka musajik.
”Awak harus baok lakeh Da Ridwan ko ka Rumah Sakik Ibnu Sina!” kecek salah surang nan tadanga.
Ondeh mak oi, ba-a lah Pak Ridwan ko heh. Bisa dipastikan Pak Ridwan tak akan mungkin mengantarkan cucu hingga peristirahatan penghabisan. Caliaklah kini, baliau aguik-aguik i.....ibo wak.
Banyak urang nan manitiak an aia mato mancaliak kajadian tragis tu. Bayangkanlah, cucu mati, anak jo kamanakan maragang nyao di rumah sakik, awak takapa pulo dek sarangan jantuang nan tibo-tibo...
Apo nan ka tajadi? Banyak urang badoa, semoga Pak Ridwan salamaik....oto Da Jun lah mambaok Pak Ridwan ka RS Ibnu Sina nan indak bara jauh jaraknyo dari kajadian ko.
Samantaro, tanpa Pak Ridwan....jenazah Didit lah salasai dishalatkan !
Kini, karando tu alah siap-siap ka diosong ka ateh Gunuangpangilun....Tanpa Opa...tanpa mama...Didit di lapeh dan di kubua mahadok Tuhan Nan Maha Kuasa.... (Basambuang) Editor : Novitri Selvia