”Pacar Lamo” (Episode 13)

23
Pinto Janir

Kring…Kring…Kring….nada klassik bunyi hape Rundi badariang. Di layia hape tu tatulih namo “Rang Rumah’.

Dari Ijah ruponyo. Indak tahangkek dek Rundi talepon urang rumahnyo doh. Inyo alun siap manarimo talepon dari Ijah. Alun. Dadonyo masih bagamuruah buncah. Buncah sabana bana buncah. Bantuak aia lawik dikisai badai. Bagalombang!

Indak lamo sudah tu, badariang lo talepon ko baliak. Indak biaso-biasonyo Ijah takah iko doh. Biasonyo, jarang bana Ijah manelpon Rundi. Biasonyo, kalau Rundi indak manjawek, Ijah manunggu talepon baliak dari Rundi.

Tapi kini, kok itu indak dilakukan Rundi. Batanyo molah Ijah dalam hati. Makonyo, inyo talepon Rundi bakali-kali.

Kriiing. Kriiiing. Kriiiing….

Babunyi lo liak talepon dari urang rumah ko…

Masih juo Rundi alun sanggup mahangkek talepon dari bininyo. A kolah garan nan tajadi? Sahinggo, batubi-tubi Ijah manelpon. Rundi makin galau.

Galau kalau-kalau adoh apo kolah nan tajadi. Apo kolah nan sadang tajadi jo anaknyo atau jo bininyo? Pas babunyi sakali lai, kini ko lansuang nyo angkek dek Rundi.

“Assalamualaikum Da….”

“Waalaikum salah Jah…” lambek Rundi manjawek. Agak nyo takan suaronyo stek.

“Da…….” agak lamo Ijah mamutuih kato. Rundi badabok. Adoh taraso dek inyo, kaba nan indak lamak ka nyo danga. Itu taraso dek nyo caro Ijah manyabuik kato, “ Da….”. Adoh nada tak lamak di kato “Da” nan tu.

“Da…..toko wak tabaka Da…..”

“Innalillahi wainna ilaihi rojiun,” Rundi spontan bakato.

Ndeh mande, bancano apo pulo nan katibo lai ko?

Rundi tadiam. Ijah tadiam. Indak lamo sudah tu sakali lai Ijah bakato jo suaro manggaretek.

“Toko awak lah abih tabaka Da…..”

Ndeh. Langkok sudah sansaro manimpo bakeh badan diri Rundi. Rundi indak tahu, apoko iko ujian, cobaan atau hukuman atau apo ko ha namonyo? Ba-a kok batubi-tubi bana bancano manimpo dirinyo?

Tuhan salahkah ambo? Kalau ambo salah batamu jo Yanti, manga ambo Tuhan patamukan? Tuhan, ambo indak sanggup lai manarimo cobaan sabarek nan ko. Tuhan…Tuhan…Tuhan…..

“Uda…!”

Rundi manariak hangok dalam-dalam. Indak dapek diagak ba-a raso badan diri manarimo cobaan nan batubi-tubi takah iko.

“Yo Jah….!” hanyo itu nan bisa dijawek dek Rundi. Dek karano indak tahu apo nan kadisabuik.

“Ba-a keadaan mitra bisnis Uda tu? “

“Anaknyo maningga. Papanyo maningga pulo dek jantungan….”

“Innalillahi wainna ilaihi rojiun….” lirih Ijah mangucap.

“Kini uda sadang di ma?”

“Masih di rumah sakik. Mitra Uda tu koma, Jah”.

Antah ba-a kolah, katikok Rundi manyabuik “mitra uda” adoh sesuatu nan tasamek di hati Ijah. Sesuatu nan indak bisa inyo gambarkan. Apo iko nan disabuik jo naluri bini? Tapi Ijah lakeh lakeh mahalau pikiran nan indak-indak nan tumbuah di hatinyo.

“Bisa uda pulang ka Bukik? Caliaklah toko awak tu da?”

Sabananyo, bisa sajo Rundi lakeh-lakeh manjawek “indak” dek karano pertanyaan Ijah dimulai dari kato “bisa”. Tapi, lagi-lagi Rundi ndak tahu jo apo nan ka inyo jawek.

Kalau inyo jawek bisa, apo inyo bisa maninggakan Yanti nan sadang koma? Kalau inyo jawek indak, ba-a pulo raso nan adoh di hati Ijah. Tantu Ijah ka bapikia, ba-a kok penting lo dek Rundi mitra bisnisnyo daripado “bisnisnyo” bana nan tabaka. Rundi harus jawek apo?

Ba-a kok Rundi takah disasak an ka ruang nan amaik sulik? Pilihan nan amaik rumik?
Basobok jo pacar lamo apo ko salah, sahinggo barek bana rasonyo hukuman Tuhan kapado badan dirinyo.

Rundi panik. Samantaro, urang Gunuangpangilun nan tadi rami di rumah sakik lah abih pai ka rumah duka. Apolagi baitu tahu bahaso Pak Ridwan lah maningga pulo manyusul cucu kasayangannyo.

Manolah mungkin Rundi maninggaan Yanti surang diri dalam keadaan koma takah iko ha. Ndak mungkin tu doh…baitu bisiak hati Rundi nan galau. Mambalah jo mambagi raso, mungkin itu bisa jo biaso.

Tapi, mambalah diri, manolah mungkin. Badan diri Rundi ko hanyo satu. Ma mungkin, ciek tingga jo Yanti, ciek pai ka Bukiktinggi. Nan kaindak-indak se tu mah.

Kalau Rundi kini ko barangkek ka Bukiktinggi, indak ka maubah keadaan bagai doh. Nan katabaka akan tatap tabaka juo. Apo adoh jaminan kalau inyo ka Bukiktinggi, kadainyo baliak takah samulo? Indak. Kalaupun barangnyo tandeh. Habih. Tapanggang sadonyo. Inyo lah siapkan tokonyo jo asuransi. Apo juo lai?

Kalau inyo tinggaan Yanti surang diri, tajadi apo-apo ka Yanti, ba-a? Buruak disabuik, sapaninggaan Rundi, Yanti tiado. Apo indak kamanambah sasa di badan dirinyo tu?
Bagi Rundi, ndak abih tandeh lah tokonyo tu, tapi inyo alun siap kahilangan Yanti.

Inyo indak bisa mandutoi diri. Kasihnyo alun tahapuih hinggo kini ka Yanti. Sacaro lahiriah inyo memang laki Ijah. Jauh di bathin nan paliang dalam, Yanti adolah bagian dari jiwanyo. Bagian dari badan dirinyo.Baitu abadinyo cinto Rundi ka Yanti.

Ijah? Ijah ibu dari anak-anaknyo. Padusi nan alah mambarinyo katurunan. Sayangnyo pado Ijah indak pulo bisa inyo dutoi. Rindunyo pado Yanti ndak pulo bisa diradokannyo. Ba-a lai ko?

Walau sadang jo Ijah sakalipun, Yanti taruih adoh di ruang raso, di ruang pangana, di ruang hati, di ruang dado. Jadi, ruang Ijah dima lataknyo ko lah? Dima……?
Rundi maraguak tangih ka dado. Dadonyo tatikam surang jadinyo. Tatikam di antaro kasiah jo sayang. Harus ba-a?

Sampai akhianyo inyo mamutuihan indak bisa ka Bukiktinggi. Ijah tadiam. Talepon inyo putuihan dek Rundi nan kini sadang barado di baliak kaco jandela tampek Yanti sadang koma.

Nun jauh di antaro Marapi Singgalang, antah ba a kolah aia mato Ijah badarai-darai surang. Badarai katikok mandanga Rundi indak bisa ka Bukiktinggi. Akankah kasiah ka carai?

Siapkah Ijah? Kalau Yanti lah sadar, siap pulokah Yanti manarimo kanyataan bahaso anak satu-satunyo, Didit dan papa nan sangaiknyo sayang lah tiado? Rundi kini manangguang seso! Rasailah…

(Basambuang)
7 Maret 2021/lbs