”Pacar Lamo” (Episode 36)

14
Pinto Janir

Ditanyo dek Yanti satantang ba-a kok papanyo alun juo kamari, mambuek ruang ko manjadi mancakam. Manjadi tahaniang. Urang-urang ko saliang pandang mamandang.

Ustad Zubir mamandang One Zusnar. Nan One mamandang Uwan Unuih. Nan Zal Rabik, pura-pura indsak mandanga. Samantaro Uwo Ucup mangango-ngangoan muncuang bantuak urang binguang.

“Ba-a papa alun juo kamari lai Wo?” Sakali lai Yanti batanyo.

“Ha, alun tibo papa kamari lai Nti?” kecek Uwo bapura-pura ndak tahu. Padohal, kalau Yanti tahu, papanyo alah mandahului kito basamo.

Dek indak tahan mancaliak cucu kasayangan ka dikubuakan, jantuangnya tagaduah. Sudah tu, papa Yanti rabah di saat baupayo sato mahangkek karando cucu kasayangan. Inyo dilarikan ka RS Islam Ibnu Sina. Di tangah jalan, papa Yanti lah indak adoh lai.

Manjalang mugarik, di hari itu juo, Papa Yanti dikubuakan di sampiang kuburan cucunya.
Raso-rasonyo, Yanti alun siap mandanga kaba buruak ko. Kalau disabuik an sacaro bajujur-jujur, dipastikan, kesehatan Yanti drop. Kini, para dunsanak papa Yanti ko bantuaknyo arif jo keadaan.

Apolagi, Ustad Zubir mambari kode ka One Zusnar, ka Unuih, ka Rabik jo ka Uwo Ucup supayo ditundo dulu manyampaikan kaba bahaso Didit jo papa Yanti sarato saudara sepupu Yanti jo para kamanakannyo lah maningga akibaik kecelakaan maut tu.

Manyampaikan hal iko di saat kini ko, sakali lai alun tapek. Nan paliang tapek pado saat kini adolah mambari Yanti sumangaik sarato doa.

“Yanti, papa jo Didit, lai aman-aman sajo,” Uwo Ucup mamacah kahaniangan suasana. Samantaro Gusnick cukuik arif. Inyo mahangguak-hangguak seakan-akan paham jo apo nan tajadi. Indak lamo sudah tu jam bezuk lah abis.

“Kami parmisi dulu Yanti. Semoga Yanti capek cegak. Capek pulih takah samulo. Kami doakan Yanti sehat baliak takah dulu,” kato Ustad Zubir nan langsuang mamipin doa di ruang tu. Ustad Zubir badoa, nan lain maaminkan.

Urang-urang ko kalua dari kamar tampek Yanti dirawat. Sudah tu dokter masuak. Urang-urang ko alun lansuang baranjak pulang. Mereka masih batahan di lua kamar sampai dokter ko salasai mamareso Yanti.

Dokter nan agak-agak gaek sangenek ko manamui dunsanak yanti nan masih tagak-tagak di luar kamar tu. “Bapak saudaranya Nyonya Yanti,” tanyo dokter ko nan mancaliak ka arah Uwo Ucup nan lansuang maangguak.

“Boleh saya bicara sebentar?”

“Boleh….,” jawek Uwo Ucup nan diangguak an dek One, Ustad sarato Izal.

“Begini Pak… begini Buk. Tamu yang berkunjung ke Nyonya Yanti, kita batasi. Mohon ada satu keluarga yang piket menemani Nyonya Yanti. Gunanya, jangan sampai ada tamu yang memberi kabar-kabar yang tak menyenangkan pada pasien kami.

Mohon terus menyemangati pasien. Jangan sampai ada pembezuk yang keceplosan ngomong soal anak dan papanya pasien, serta keluarga yang jadi korban kecelakaan tersebut. Mohon, kabar-kabar buruk seperti itu ditahan dulu. Nanti ada saatnya. Kita tunggu dulu sampai kesehatan nyonya Yanti benar-benar pulih kembali,” kecek dokter nan indak pandai babaso Minang tu.

“Bapak-bapak dan ibuk-ibuk, tolong ini jadi perhatian kita bersama, ya,” kato sang dokter.
Para dunsanak Yanti maangguk-angguk tando mangarati. Sudah tu, dokter tu parmisi mintak pai.

“Ondeh, untuang indak tasabuik dek awak,” kato Ustad Zubir.

Tibo-tibo Gusnick bakato: “Boleh saya ikut ke Gunungpangilun?”

“Mengapa tu? Tak ada orang di rumah. Orang sedang bersedih. Mau mengapa kamu ke Gunungpangilun?” kato One Zusnar diiyoan dek Zal Rabik.

“Saya hanya ingin kenal dengan keluarga Yanti di Padang?” jawek Gusnick. (Basambuang)