”Pacar Lamo” (Episode 14)

26
Pinto Janir

Aia mato Ijah badarai-darai di Bukiktinggi. Samantaro, dari balik kaco ruang rawat inap RS Dr M Djamil Padang, hati Rundi hancua badarai-darai mamandang urang nan disayang takapa di ranjang rumah sakik tu.

Nan paliang sudah tu iyolah mambalah raso. Ciek raso ka Pacar Lamo.Ciek lai raso ka bini. Di ma tagak raso nan paliang adia tu? Tagak ka Yanti atau tagak ka Ijah?

Rundi manarik angok dalam-dalam. Inyo manggeleang-geleang surang. Ba-a laiko? Ba-a lai ko? Batubi-tubi partanyaan nan ko manutuah jantuang hatinyo.

Yanti indak hanyo sakadar cinto lamo. Indak baitu. Nan mambuek Rundi tasuduik adolah karano inyo alah mahukum dirinyo surang jo raso nan panuah sasa.

Dek karano Rundi nan manyuruah Yanti manuruiknyo ka Bukiktinggi. Padohal, Yanti lah punyo rencana pai bajalan-jalan jo bakonyo ka Mandeh Painan. Yanti batalkan ka Mandeh. Nyo piliah ka Bukiktinggi.

Di tangah jalan, cilako tibo. Malang manimpo. Kecelakaan. Didit, Ijah jo kamanakannyo bagai jadi korban. Bahkan, papa Ijah maningga dek serangan jantuang mancaliak cucu surang tabujua kaku.

Ondeh mak oi, ba a lai ko? Rundi lelah. Tak sadar inyo basilunjua tasanda ka dindiang di koridor bangsal tu.

***
Yanti sadar. Inyo manyabuik-nyabuik namo Rundi bakali-kali. Rundi tasantak.

“Didit…Didit…!” Yanti manggigau. Rundi mangganggam tangan Yanti arek-arek. Saarek hatinyo ka Pacar Lamo. Yanti mambukak mato lambek-lambek.

“Rundi…di ma Didit?” tanyo Yanti. Rundi tak tau apo nan kadijawek. Nyo rangkuah Yanti dalam raso ibo.

“Rundi…Didit dima?” dasak Yanti. Tampak Rundi baupayo managa-nagakan badan. Nyo atur hangok. Nyo atur irama mangecek.

“Di ma Didit, Rundi!” Sanapas kudo malajang, jo pasti Rundi bakato mambilang. Saat kini, bukan saat nan tapek untuak bajujur-jujur.Bialah baduto. Rundi takuik kalau nyo sabuik kajadian nan sabananyo, Yanti akan lansuang drop.

“Didit dirawat di subalah”

“Alhamdulillah….” lambek Yanti bakato. Nyo paarek palukan Rundi. Tapi, Yanti indak pernah sadar bahaso aia mato Rundi jatuah ka rambuik Yanti nan tagerai manjo.

Tapi antah ba a pulo pangka carito, tibo-tibo adoh Ijah di muko pintu tu. Mancaliak Rundi mamaluak Yanti, Ijah mundur…. lambek-lambek inyo mundur. Tapi telat.

Salayang Rundi malengoh, tampak dek nyo bininyo. Nyo lapehkan lakeh palukannyo ka Yanti. Yanti jo Rundi samo-samo tapana.

“Ijaaah,” bisiak Rundi ka Yanti nan masih tampak binguang. Rundi lansuang bagageh mangaja Ijah nan tampaknyo ka lari dan manjauh…

Baca Juga:  ”Pacar Lamo” (Episode 151)

“Tunggu Jah…tunggu!” Rundi mangaja Ijah. Ijah taruih balari. Rundi taruih mangaja.

“Tunggu Jah….,” Rundi manangkok tangan Ijah. Ijah takah baupyao mangalatiak an tangan lakinyo ko.

“Bisa uda manjalehkan?” Katikok Rundi mangecek takah iko, sungguah baru sakali ko Rundi manangkok mato Ijah nan tajam. Tapi, tajam matonyo nan tun, tajam mato panuah luko.

“Alah…Da…alah tu mah Da….biakan Ijah pai,” kato Ijah takah mambana ka Rundi nan taruih mamacik tangan Ijah.

“Lapehan lah Da… malu awak dicaliak urang,” lambek jo hati panuah taibo, maluncua kato-kato Ijah di antaro lalu lalang urang di koridor rumah sakik tu.

“Uda, indak kamalapehkan tangan Ijah doh.. sabalun Ijah mandanga penjelasan dari Uda”

“Apo juo nan ka Uda jalehan lai….,” sungguah lambek Ijah bakato sambia tatakua, titiak jatuah aia matonyo. Sabagian jatuah ka pipinyo, sabagian jatuah ka ruang dado.

“Jah…. danga kato Uda yo…..,” Rundi manakan suaronyo. Agak adoh stek nada perintah.

“Sampai kini, uda masih laki dek Ijah. Danga kato Uda ko….” Ijah mulai tahaniang. Mulai manuruik. Mulai takah kanai rimot.

“Ijah, ingek Jah. Anak-anak kito…” Ondeh mak oi. Kato-kato Rundi tu manambah luko di hati Ijah. Harusnyo, kato-kato tu adolah kato nan saharusnyo, kalua dari muncuang Ijah, bukan dari muncuang Rundi. makin tatakan Ijah.

Tapi ba-a lah. Inyo tak bisa pulo malawan keadaan. Walau disakiti dek Rundi, Ijah indak bisa mamungkiri perasaannyo. Perasaannyo, amaik cinto dan amaik sayang ka Rundi. Amaik takuik kahilangan Rundi.

Bakacamuak isi di ruang dado Ijah. Ma pulo adoh bini nan tahan mancaliak lakinyo mamaluak urang lain. Tabayang dek Ijah kajadian babarapo menit nan lain. Tabayang. Tabayang makin jaleh. Makin nyato di ruang ingatan. Makin takana makin cukam jatuahnyo luko.

Ijah bausaho mananangkan diri. Lambek-lambek inyo mamohon supayo Rundi malapehkan pacik tangannyo.

“Da, mohon lapehkan Da….” Lambek-lambek Rundi malapehkan ganggaman tangan.
Ijah bausaho mangandalikan diri. Nyo pandang Rundi jo tatapan hampo. Sahampo hatinyo nan panuah luko.

“Da, biakan Ijah mananangkan raso… Ijah pai dulu Da. Uda jagolah dulu mitra bisnis Uda tu… kasihan, inyo sadang sakik. Jan dulu uda pikiakan Ijah….,” Ijah bausaho tasenyum.

Senyum Ijah, sungguah mambuek Rundi tapuruak jauh. Rundi indak bisa mahambek langkah Ijah…Ijah pai…pai. Tapi, apokah Ijah akan pai untuak salomaonyo? (Basambuang)