”Pacar Lamo” (Episode 15)

20
Pinto Janir

Memang badabok-dabok darah Rundi, tiok tabayang Ijah. Apolagi kini di layar HP-nyo Ijah bana kini nan manelpon. Diangkek atau indak? Kalau diangkek, lai indak kaba rumik nan kadikirim dek Ijah?

Kalau indak diangkek, Rundi takuik jo gamang pulo, ijan-ijan adoh sesuatu nan tajadi di Bukiktinggi, tautamo tantang anak-anaknyo. Siapo tahu, Ijah mambari kaba tentang anak-anak.

Sabananyo yo, Rundi alah rindu kareh ka anak-anaknyo. tapi, ba-a lah, kini inyo sadang mandapek cobaan nan kaerh pulo. Ma nan kareh cobaan daripado manahan rindu? Tampaknyo samo-samo kareh. Andaikato Rundi bukan laki-laki nan ”kareh”, mako dapek dipastikan we e lah setrok manarimo cobaan nan timpo batimpo ko.

Tapi yakinlah, Tuhan indak ka pernah mambari cobaan jo ujian ka manusia di luar bateh kamampuan manusia tu sandiri. Satiok apo-apo nan tajadi, yakinlah; pasti adoh jalan kaluanyo. Tiok nan sampik baujuang lapang, tiok nan sulik baujuang mudah.

Tapi, itu bagi urang-urang nan saba jo tabah manarimo cobaan. Kalau awak manarimo cobaan bamete-mete, maupek-upek, bahkan ’berang’ lo ka Tuhan, jo kato-kato nan indak-indak, picayolah, itu alamaik jalan buntu nan kadidapek.

Sampai saat kini, awak indak tahu doh, apoko Rundi kuaik manarimo apo-apo nan kini manimpo badan dirinyo?

Nyo angkek talepon Ijah. ”Yo Jah….ba-Jah?”

”Uda…bilo uda ka Bukittinggi?”

Ditanyo takah itu dek Ijah, Rundi tahanok. Tahaniang. Kacamuak di dadonyo bantuak urang mambuncah lauak di tabek nan dangka.

Rundi manariak hangok panjang. Sempat-sempatnyo inyo mangaluakan rokok di saku. Nyo baka rokok dulu. Samantaro Ijah mananti jawek jo hati nan rusuah.

”Da…..!”

”Yo Jah…..” jawek Rundi.

”Uda sempatkan sabanta pulang ka Bukik dulu. Sajak patang urang asuransi jo Pak polisi bolak balik batanyo ka Ijah. Indak adoh ciek juo nan bisa tajawek dek Ijah…. Urang asuransi Da, batanyo soal polis. Di ma surek-surek asuransi tu uda simpan?” tanyo Ijah ka Rundi.

”Oooo…ondeh. Ndak salah Uda surek tu talatak di toko…!” jawek Rundi manggegek.
Rundi masih ingek, wakatu tu, patugeh asuransi manamui Rundi untuak mampapanjang polis.

Tapi Rundi ragu lo, apo saat tu urusannyo salasai jo pihak asuransi. Inyo mulai ragu, ijan-ijan polisnyo lah mati. Soalnyo, wakatu tu urang asuransi manghubungi Rundi untuak mampapanjang polis.

Bahkan kajadian tu baru babarapo hari sabalun toko e tabaka. Rundi masih ingek, bisuak-bisuak se wak urus, baitu keceknyo ka pihak asuransi. Dek karano, wakatu tu, kalau ndak salah, Rundi sadang sibuk-sibuk maurus persiapan untuk bamitra bisnis jo Yanti sarato jo kawannyo nan surang lai tu ha. Sudah tu baru tajadi kecelakaan.

Baca Juga:  ”Pacar Lamo” (Episode 151)

Oi. Bagawa ko. Ijan-ijan, polisnyo lah mati! Kalau itu tajadi, matilah Rundi. Bangkrutlah Rundi. Sangsailah Rundi.

”Ba-a uda kok diam?” suaro Ijah mangajuik an lamunan Rundi.

”Jah…..Jah…Uda ragu Jah.Jan…jan, asuransi toko wak tu lah jatuah tempo tapi alun sempat uda papanjang!”

Ops. Ijah lansuang talonjak.

”Ondeh Da, ba-alai tu Da….Pulanglah uda agak sabanta dulu. Apo mitra uda tu lah sehat?”
Rundi manggaruk-garuk kapalo kabingungan. Inyo alun mambari tahu Ijah bahaso akibaik kecelakaan tu, indak sajo anak jo papa Yanti nan maningga, tapi kamanakan jo sepupu Yanti, ikuik pulo jadi koran mauik.

”Bekoh Uda kabari Ijah !”

”Yo Da….”

Makin lamah jantuang hati Rundi. Kini apo nan harus inyo lakukan? Ondeh mande Tuhan oi….Rundi iyo sabana-bana abih aka. Pado saat inyo dalam kabingungan tu tibo tagopoh-gopoh Tek Bina Gapuak bako Yanti. Etek ko muncuang e cipeh.

Antah ba a ko lah, bako-bako Yanti ko, tautamo etek-etek e..atau sapupu papa e..banyak nanagak babadan. Tigo dari ampek etek e, gapuak. Ciek nan lisuik. Tek Bina ko bagala Tek Gapuak.

Rambuik karatiang. Pangka langan gadang. Paho e sagadang palo urang gadang. Jalan e barek. Sabana barek. Mungkin dek paho e balipek-lipek, tek Gapuak ko caro jalan e bantuak urang zigzag. Indak bisa bajalan luruih. Ibo wak kalau maliek Tek Gapuak bajalan. Iyoh payah bantuaknyo inyo maharak badan bajalan.

Sapadan di darek/sadindiang di padang/badan barek/ katidiang gadang. Tu pantun nan cocok untuak Tek Gapuak. Inyo, lewat di muko Rundi. Tek Gapuak ko indak tahu, Rundi ko sia.

Rundi baitu pulo, tak pulo tahu, amak nan gapuak ko dari ma? Nan jaleh, Tek Gapuak batanyo ka salah seorang perawat nan sadang lewat di muko kamar rawat Yanti. Inyo batanyo tantang di ma Yanti dirawat. Tadanga dek Rundi. Baru Rundi tahu, bahaso mungkin sajo amak-amak gapuk ko dunsanak Yanti. Nyo dakek an dek Rundi amak ko.

”Maaf mak, amak dunsanak Yanti?”

Gadang incek mato Tek Gapuak dipaamak dek Rundi. Tek Gapuak paliang maleh kalau urang mampa-amak-amak-annyo. Tek Gapuak ko paliang suko kalau disapo jo sabutan kato ”Ibuk”.

”Ambo bukan amak-amak. Ambo masih ibuk-ibuk. Situ sia?” kecek Tek Gapuak.

”Yo Buk. Maaf Buk. Ambo kawan Yanti!”

”Oh, situ yo nan pacar lamo si Yanti nan manyababkan dunsanak kami balangga?”
Andeh mande. A po lo gaya etek ko..ko ha…

Dari ujuang koridor tampak Gilang wartawan Padang Ekspres tagopoh-gopoh pulo manuju ka arah Rundi nan sadang terjebak jo percakapan tegang jo Etek Gapuak. (Basambuang)