”Pacar Lamo” (Episode 113)

10
Pinto Janir

Kalau lalu di angan, paham tatumbuak. Ba-a caronyo? Apo jalan kaluanyo? Yanti alah manunggu di Padang. Samantaro, hari lah mulai pulo masuak pukua duo. Sia ka dibela? Yanti? Atau kaluarga? Anak-anak?

Ondeh mak oi. Raso aia ka pamatang. Raso minyak ka kuali. Nan bakabek rasan tali. Nan babungkuih rasan daun. Sabana rumik. Ka sia Rundi ka bapihak? kalau bisuak pagi Rundi barangkek, sah Yanti kecewa.

Artinyo, muncuang Rundi indak bisa dipacik. Indak batangguang jawab tahadok apo nan alah disampaikan. O alah. Raso ka barek dilapehkan. Raso ka sulik dielakkan. Rundi, asli… bak cando mangganggam baro.

Sudah makan siang tu, nyo baok duduak sabanta di teras nan taduah. Nyo mintak Ijah mambuek an kopi. Untuak manaduah-naduahan pangana, dibaco Rundi molah Koran Padang Ekspres. Laruik inyo mambaco koran kabanggaan urang Minangkabau tu.

Pueh baco koran. Inyo galunjuaan kakinyo. Inyo rabah-rabahan badan di kursi. Ijah nan sajak tadi sibuk mangamehkan siso makanan sarato mancuci piriang, kini lah tibo di mungko Rundi.

Batanyo molah bininyo ko. ”Da, kok panik bana bantuak Uda? Adoh pikiran uda nan barek?”

Srrrrr. Badasia darah Rundi. Sajak babarapo hari balakangan ko Ijah bantuaknyo labiah acok manyimak galagaik Rundi. 7777Rundi mahangguak-hangguak. Inyo sadang baimajinasi mancari jawek nan tapek. Nyo bae mahambuih. Huufffff!

”Barek ba-a nan kaindak pikiran Uda Jah. Tokok awak tabaka. Asuransi tak kalua. Hanguih sadonyo. Samantaro, hutang di bank harus wak bayia tiok bulan. Uda harus bapikia kareh untuak mambukak paluang bisnis baru. Nan ka uda turuik di Padang ko adolah…….Hmmmm,” Rundi bapikia. Mancari sabuah namo imajiner.

”Kawan uda. Inyo bagerak dalam bisnis properti. Kami barancana ka mambukak jo mangambangkan parumahan di babarapo lokasi di Padang. Yo, rumah-rumah manangah ka ateh. Siapo tahu, di siko rasaki kito baru ka tumbuah.

Tapi ba-a lai? Baru se partamo kali ka batamu di Padang, janji uda lah mulai tak tapek. Di ma urang ka picayo jo awak. Pitih ko Jah. Pitih! Peluang usaho. Iko nan uda sio-siokan….!”
Mandanga tun, Ijah tadiam.

Baca Juga:  ”Pacar Lamo” (Episode 151)

Adoh sasa di rawik wajahnyo. Ijah manyasa, manga inyo harus egois bana. Sabananyo, Rundi kan bisa sajo makan siang di jalan. Bukankah, makan siang ko, bilo na se bisa.
Gadang sasa Ijah. Apolai tabayang dek Ijah tantang maso depan. Tabayang, rasaki ka tarang. Tabayang, pitih ka masuak ka saku-saku laki.

”Ondeh, ba-a caronyo lai tu da?”

”Itulah, Uda manyarah se ka Nan Kuaso. Uda indak pulo tahu apo kadibuek lai. Uda bajanji jo inyo pukual ampek. Kini hari lah pukua duo. Jalan tak bisa diprediksi. Kok macet di jalan, bisa-bisa Bukittinggi Padang ko mamakan waktu duo satangah jam.

Bahkan, bisa tigo jam kalau macetnyo panjang …Wak tarimo se lah keadaan nan takah iko lai Jah. Nan rasaki indak ka tatuka…..!” kato Rundi sambia mancaca kopi hangek di tangah hari. Jo caro tanang Ijah bakato. Nyo pandang wajah lakinyo ko.

”Da, kini hari kan masih pukua duo. Kalau uda barangkek kini, mudah-mudahan jalan indak macet. Uda barangkek se lah capek. Sagan pulo awak, udah alah bajanji…..”

”Heh…..,” kata Rundi bantuak urang mangaluah.Babarek-barek an badan.

”Kalau uda barangkek kini, bukankah uda lah bajanji jo anak-anak ka pai makan malam beko?”

”Makan malam tu, bisa wak tundo kapan-kapan Da? Pai lah uda kini. Bia Ijah nan mangecek ka anak-anak,” jawek Ijah.

”Kalau iyo itu nan rancak dek Ijah, barangkeklah uda molah…..!”

Jo gaya bamaleh-malehkan badan, Rundi manuju ka otonyo. Wakatu inyo ka manuju ka oto, Greno jo Suci kalua pulo sambia bakato: ”Papa, nanti kita makan malam, jadi ya Pa!”
Ondeh…! (Basambuang)