”Pacar Lamo” (Episode 85)

11
Pinto Janir

Greno, salasai sudah mandi. Nan Ijah manyiapkan sarapan pagi. Suci adiknyo tadi batanyo ka mamamnyo, ba-a kok abang Greno pagi-pagilah mandi. Dijawek Ijah, abang Greno ka pai jo papa.

Suci baliak batanyo pakai baso Indonesia. ”Ma, emangnya abang sama papa mau kemana Ma ?”,memang di rumah tanggo ko, baso pengantarnyo baso Indonesia.

Alasan Rundi, bia anak-anaknyo mudah mamamahi apo kato Buk Guru di sakolah. Ijah manjawek, ka anak bungsunyo ko,” Papa mau mengantarkan abang untuk berobat !”.

”O… ke dokter Ma?”

Partanyaan Suci dijawek jo senyum sang mama. Ma mungkin pulo Ijah manjwek, si abang dibaok papa pai barubek ka urang pintar !

Sasudah tu Suci, diam sajo. Bocah kamek tu bagageh pulo ka kamar mandi.
Baitu hari alah masuak pukua sapuluah pagi.

Bakato molah Rundi ka Ijah: “ Mudah-mudahan Greno cegak yo Jah “. Ijah lansuang mangaminkannyo. Ndak lamo sudah tu, Rundi maimbau Greno. “ Ayo Bang Greno, buruan dikit ya !”.

Greno bagageh, lari ka ateh oto. Rundi lah siap ka mambaok Greno ka Etek Jariyah. Sabalun barangkek, Rundi maajak Ijah pai,”Nggak mungkin Da, Suci jo sia ka tingga !”. Batua Ijah, kok dibaok Suci, raso indak ka masuak. Raso-raso ka banyak partanyaan Suci.

Anak gadih ngenek Rundi ko urangnyo kritis.Sagalo ka nyo tanyo. Bisa sajo inyo batanyo, kok abang nggak dibawa ke dokter aja!. Ha, payah manjalehkannyo. Pado payah manjalehkan, rancak Ijah jo Suci di rumah sajo.

Baca Juga:  ”Pacar Lamo” (Episode 151)

”Hati-hati yo Da !” Ijah malambaikan tangan ka Rundi.

Pajero tu lansuang manuju ka Kampuang Lamo. Kampuang lamo kampuang Rundi. Kampuang ko disabuik dek Rundi sabagai kampuang lamo.Sabananyo kampuang ko tapeknyo di Lasi. Tasabuik Lasi banyak urang santiang nan baalemu tinggi.

Urang Lasi, santun jo panyapo. Elok budi, tapi indak banyak carito. Urang kampuang Rundi tasabuik kompak jo basatu, tautamo untuak mambangun kampuang.

Barek samo dipikua, ringan samo di jinjiang, sasakik sasanang, sahino samalu. Baitu bana adaik iduik di Lasi. Saliang mambantu jo saliang manolong.baitulah tradisi nan lakek di Lasi.

Sabalun pai ka rumah Etek Jariyah, Rundi singgah ka rumah Angah Alim. Tampak rumah Angah Alim langang sajo. Biasonyo jam sagiko, Angah jo rang rumahnyo pai ka ladang. Angah Alim baladang tabu, jo baladang sayua-sayuan. Ka bini Angah Alim, Rundi bamintuo.

Dicaliak rumah, iyo indak bapahuni. Bakato Rundi, ka Gerno anaknyo. “Greno, tunggu di sini sebentar ya. Papa mencari Angku Alim dulu ke ladang di sana”, Rundi manunjuak ka arah ladang Angah Alim.

Greno patuah sajo sambia bakato: “Papa jangan lama-lama !”.Greno manunggu, di ateh oto. Bagageh Rundi pai ka ladang nan indak jauh dari rumah Angah. (Basambuang)