”Pacar Lamo” (Episode 66)

14
Pinto Janir

Nan paliang susah dilupokan kaum hawa, katikok hatinyo tacurah ka surang laki-laki. Kalau cintonyo lah panuah jo padek di jantuang hati, sulik molah baginya mahangkek bungo cinto nan tumbuah dado.

Sakuek-kuek inyo baupayo untuak malupokan sagalo-galonyo, sakuek tu pulo dasak dado manyeso raso. Baitu pulo molah sabaliaknyo. Kalau padusi sakali didutoi, saumua-umua hiduiknyo, sulik baginyo untuak picayo takah samulo.

Susah inyo malupokannyo. Sakalipun inyo alah mambari maaf di muluiknyo, namun pangananyo pasti tatap maingek apo nan alah pernah tajadi.

Namun baitu, bagi laki-laki nan alah pernah talongsong atau kilaf agak sakali luruih, jalan satu-satunyo maubek luko hati padusi, tunjuak an jo sikap. Jan jo lidah nan bamuncuang. Sabab, adaik lidah indak batulang, adaik muncuang polongan asok.

Tulang lidah di pangana. Tulang muncuang dalam raso. Bapikia dulu, baru mangango. Tapi, indak saluruah apo nan tapikia harus disampaikan.

Supayo apo nan awak kecek an nan tun indak malukoi hati urang, indak manyansam, indak manusuak,molah pakai sariang raso. Kalau pangana alah tasariang, sagalo tubo, lanyok dibueknyo.

Makonyo, paubek hati padusi nan alah talukoi adolah sikap. Bukan kecek. Bukan kato.
Kini, Rundi barado di ruang nan sangaik rumik. Kalau inyo manenggang Yanti, nan tabedo Ijah. Kalau inyo manenggang Ijah, otomatis Yanti harus dilupokan.

Malupokan Yanti?

Di siko pakaro tu mangko ka tibo. Sabananyo, iko indak ka manjadi pakaro kalau sakironyo tapuak sabalah tangan. Sajak dulu hinggo kini, dalam pikiran jo pangana Rundi, Yanti ka Yanti se. Maaf manyabuik, kadang-kadang inyo indak bisa mamisahkan pangana.

Sadang jo Ijah nan takana Yanti juo. Sadang di bilik nan paliang rasio, nan tabayang Yanti juo. Katikok inyo mahampai Ijah, pangananyo justru ka Yanti. Sahinggo, anak padusinyo mirip bana jo Yanti.

Mungkin Yanti baitu pulo ko. Caliaklah tu ha, almarhum Didit anak Yanti, maireh-ireh bana mungkonya ka Rundi. Kalau dicaliak sakileh, urang bisa salah sangko. Bisa disangko urang, Rundi apaknyo Didit.

Baca Juga:  ”Pacar Lamo” (Episode 148)

Cinto sampai mati tu iyo babayo. Cinto abadi tu cinto nan indak parnah salasai. Cinto Rundi jo Yanti kinilah bagai cinto tapuak babaleh. Angguak anggak geleang tak iyo.

Pandang sampai nan raso manga tagaing pulo. Katikok wakatu mampartamukan urang baduo ko, alam saolah-olah bantuak manantang atau mauji, mauji atau mahukum. Cinto batamu, pakaro baleak-leak.

Musibah tibo timpo batimpo. Anak mati. Abak mati. Sudaro sapupu mati. Tokok tapanggang. Asuransi lupo pulo mampapanjang. Sadonyo batirik-tirik jadi pakaro.

Apo iko paringatan dari Tuhan, bahaso Rundi salah. Yanti salah. Ruang waktu salah. Cinto salah. Nan bana tu rindu? Kalau rindu hanyo sakadar bungo di taman hati. Kalau hanyo sakadar ingatan pamanih hiduik.

Kalau hanyo sakadar matoari dalam dado, ah itu biaso. Tapi, bari tampek jo ruang nan babiliak-biliak. Ijan sabiliak an cinto jo rindu. Nan rindu, pulangkan ka puisi. Nan cinto nan indak pado tampeknyo buang ka banda bakali.

Tapi, tatap juo babayo kalau cinto nan tabuang tu mambaok rindu. Akibaiknyo, rindu jadi paapuang-apuang. Cinto itu indak tabanam. Inyo hanyuik. Jadi apo masalahnyo? Rindu nan mahanyuik an.

Ah, batele-tele.

Ma nan bana ko?

Sulik malah mancari kabanaran kalau nan bana tu bana nan lah manguasoi hati. Odeh mak oi. Cinto.Rindu.Banci.Sakik. Sanang. A ko lah pamisahnyo.

E…yayai.

Rumik jadinyo.

Bamain api tapanggang. Bamain aia basah. Bamain cinto luko. Bamain rindu sangsaro.
Nan Rundi kini basengko jo Ijah. Tapi, hatinyo duduak jo Yanti. Nan Yanti kini sadang tamanuang. Duduak surang di barando rumahnyo di Ulakkarang. Sudah tu lewat surang laki-laki mamakai motor Harley! Sia ko? (Basambuang)