”Pacar Lamo” (Episode 125)

14
Pinto Janir

Agak lapang rasonyo hati Rundi baitu Ijah salasai manelpon. Agak lega hatinyo stek baitu alah maagiah tahu kabaradaan nan palsu ka Ijah. Parsangkoan Ijah, Rundi tantu sadang sibuk maurus bisnis jo kawannyo. Mungkin sadang malanjuik an lobi jo kawannyo nan disabuik-sabuik Rundi sabagai investor.

E..yayai…Ijah-ijah.

Naluri Ijah sabagai bini adoh. Adon nan tasamek di hatinyo, tapi itu inyo abaikan. Inyo maleh mampakusuik hati surang. Malam ko inyo sadang Isya, badoa ka Tuhan sudah tu manyarahkan diri kapado Tuhan Nan Maha Kuaso.

Samantaro Rundi jo Yanti alah naik ka ateh oto. Rundi sandiri indak pulo tahu doh, kama ka pai sudah ko. Adoh limo menit urang ko bajalan cucukrubu, jalan nan indak tahu kama tampek dituju. Nan jaleh, Rundi manakan gas. Nan Yanti sadang bagamuruah di hati.

Sampai ka Pertamina Bunguih, Rundi mulai baranti. Inyo katapian oto. Sakali lai, inyo batanyo; ”Kama wak lai Nti?” Yanti mamandang Rundi jo mato panuah rindu sarato kasiah jo sayang. ”Jak tadi alah Yanti katokan, semua tasarah Rundi….,” katonyo.

Eh, Rundi lansuang manjawek jo suaro nan rado-rado agak manggoda. ”Eeee…mande yo. Tadi bauda, kinilah ba Rundi pulo baliak. Ba-a agaknyo ko?”

”Jadilah, tasarah Uda!” jawek Rundi.

”Pulang se awak lai ba-a?”

”Tasarah Uda!”

”Serius ko?”

”Serius!”

”Uda larikan Yanti ba-a?”

”Maleh mah….”

”Ba-a kok maleh?”

”Latiah balari tu!”

”Hahahahaha….,” tagalak Rundi.

Ndak lamo sudah tu, agak mandakek duduak Yanti ka Rundi. Tibo-tibo, inyo basanda di bahu kiri Rundi. Taraso dek Yanti, baralah ka nyamannyo basanda di bahu urang nan dirindu. Samantaro, nan Rundi manggagak. Manggalagak tak bakatantuan.

”Ba-a kok diam se Uda?” agak mulai langih caro Yanti mangecek. Rundi diam dek karano adoh sasuatu nan manggabubu di dadonyo. Lai ko lah Yanti tahu.

”Pulang se awak lai Yanti?”

Sakali lai Rundi batanyo.

”Tasarah Uda,” masih takah itu juo baru jawaban Rundi.

Kalau, hal-hal nan takah iko ditanyo ka laki-laki, mako jawabannyo; iyo agak rumik. Kok taruih pulang, bapisah raso tak lamak. Kok ditaruihan jalan, hari lah malam. Indak rancak dicaliak tetangga mamulangkan padusi marando di tangah malam.  Jadi ba-a caronyo lai ko.

”Yanti lah pernah ka kawasan Mandeh?”

Ditanyo dek Rundi baitu, Yanti lansuang manggeleang. Samantaro, Rundi gugup.

”Manga awak balamo-lamo bana baranti di tapi jalan ko..ko Da. Ditangkok pulo wak dek pemuda bekoh,” kato Yanti jo suaro nan taamaik lunak.

Rundi bajalan. Inyo babelok di Simpang PLN Taluaksirih. Ondeh, ka Mandeh samalam nan ko? Cilako! (Basambuang)