”Pacar Lamo” (Episode 98)

15
Pinto Janir

”Ondeh, alah ma oi… Indak ibo kalian jo almarhum. Caliak almarhum tu. Sadarlah. Indak tanang bekoh aruah almarhum. Ndak sampai baliau bekoh!” Lah mahampeh-hampehan tangan Pak Pirin ka urang nan sadang bagalinsam-pinsam tu.

Tautamo si Nesti, inyo tatap juo bantuak urang kasetanan. Maratok maratuang. Muncuangnyo bakaleperen. Untuang adoh tigo parewa nan tasabuik di tangah nagari. Nan partamo banamo Jang Tunuih. Bunyi kaba, inyo pandeka.

Santiang basilek jo main bola. Nan kaduo banamo Pipar. Walau indak pernah baraja alemu bela diri, tapi Pipar ko bagak. Nyalinyo kareh. Bapantang takuik. Nan katigo, Jonggarogoh. Si Jongga ko, tangan kida e baracun.Sakali mamaka urang, bisa ka UGD urang inyo buek.

Tapi parewa batigo ko, salalu manjago kampuang. Kalau ribuik-ribuik urang di kampuang, inyo nan tajun ambau labiah dahulu. Inyo ka mano-mano batigo taruih se bajalan mah. Kini, parewa batigo ko sadang adoh di rumah nan kamalangan ko.

Mancaliak keadaan indak bisa ditolerir, dek karano kamanakan Zalmi tatap basikareh ka mambaok mayik mamaknyo ka Padang, mangko bakato molah Jang Tunuih .

”Ambo bukan ikuik campua Da. Sarancaknyo uda, batanang molah dulu. Jan dilawan. Inyo padusi. Rancak uda hanok se…!”

”Eh, kawan, ambo indak ka turun dari rumah ko sabalun mayik tabaok dek kami. Inyo mamak kami. Kami wajib mambaoknyo!” emosi bana suaro Jun Thalib agak ati e.

”Iyo, kami paham. Nan almarhum mamak Uda. Indak ibo uda mancaliak mamak Uda?” sato pulomanyolo si Jongga jo bahaso lunak.

”Mamak kami bukan urang tabuang. Kalau liau lah maningga, kami para kamanakannyo berhak mambaok mayik pulang ka tampek asal kami di Padang,” kato si Dasri.

Baca Juga:  ”Pacar Lamo” (Episode 146)

”Iyo, Uda batua. Cubo uda hinok rasoi. Ambo raso, indak adoh salahnyo kalau uda mangalah. Demi, anak Da Zalmi juo. Caliaklah anak-anaknyo Da. Anaknyo tu indak adoh nan normal tu doh. Indak ibo Uda, ka adiak-adik tu?” bakato pulo Pipar sambia manunjuak ka anak-anak Zalmi nan manangih di kaki bapaknyo nan alah manjadi mayik.

”Pa….pa….pa…pa,” katigo tigo e sarentak bunyi tangih e takah itu.

Samantaro, si Nesti maratok bantuak urang badendang. Ratok e ratok urang lamo. ”Ondeh Uda oi…Uda Zalmi….Nan Nesti jo anak-anak iyo indak ka rila kalau mayik uda dibaok dek kamanakan uda nan kalera!”

”Eh, mintuo, sampai kini kami masih maanggap mintuo sabagai mintuo kami. Nan kami ijan dipakalerakan pulo. Lah acok bana talongsong muncuang mintuo ko mah!” kato si dasri nan sangaik tasingguang dikalerakan dek si Nesti.

”Kalau wa-ang buklan urang kalera. Barasak wa-ang dari ateh rumah ko!” Nesti tabik suga lo baliak. Nyo tunjuk-tunjuk kida kamanakan si Zalmi.

”Kan alah ambo kecek-an ka Uda. Rancak Uda baok batanang. Duduaklah kito ka halaman tu dulu lah!” kato Jang Tunuih nan diangguk an dek duo konco e tu si Jongga jo si Pipar.

Tigo parewa ko lansuang se manggiriang lunak duo kamanakan si Zalmi tu. Antah apo lo ilmu tigo parewa ko, lah manuruik se si Jun Thalib jo Dasri Burik. (Basambuang)