”Pacar Lamo” (Episode 151)

18
Pinto Janir

Kalau cinto adolah garik, mangko hiduik adolah dabok. Dek ulah manggarik, badabok sadoalah ruangan. Tiok suduik manjadi lirik nan manggalitik. Ngilunya tanpa titik. Tiok ruang manjadi taman indah di hati nan mantik. Sagalo nan tampak manjadi saindah puisi bagai buah baputik. Apo nan taraso mamicu induak birahi sairama hujan nan rintik-rintik.

Dari mato, saguntia ujuang tangan manyasak ka ruang dado, indak lapeh-lapeh mamacik.
Jo getar suaro nan mandayo, Yanti bakato dalam galombang kato nan indak tatahankan dek karano garik jo dabok basakutu dalam mimpi-mimpi nyato.

Jo lambuik Rundi mamacik ujuang-ujuang jari tangan Yanti. Ujuang jari nan indah.

”Yanti…..”

”Yo Da….”

”Yanti, lai picayo ka uda?” Yanti manunduak. Wajah Rundi makin dakek.

”Uda…..”, Yanti lansuang marangkuah Rundi. Duo insan tu bapaluak mesra. Indak tahu awak, apoko itu palukan kasih sayang atau palukan kasih nafsu? Antahlah!

Nun jauh di Bukiktinggi sinan, Ijah nan sadang mahambiak wudhu, antah apo sababnyo, tagalincia di kamar mandi. Kapalonyo balangkang ka lantai. Darah mangucua. Ijah maimbau-imbau namo anaknyo.

Tapi, inyo lupo bahaso tadi siang adik laki-lakinyo nan baru datang dari Jakarta mambaok Greno jo Suci pai jalan-jalan ka Jam Gadang. Tinggalah Ijah surang di rumah. Kini Ijah sadang dalam kasakitan. Darah mancoroh makin banyak. Ijah tampak lamah.

Inyo indak bisa tagak. Satangah pingsan agaak e. Tapi, darah indak kunjuang baranti. Tapi, mari kito caliak apo nan tajadi di Padang. Rundi jo Yanti nan bajanji ka manamui Dirga di Basko Hotel, kini justru sadang laruik dalam suasana cinto nan tajebak napsu birahi gilo.

Yanti bagayuik mesra. Duo tangannyo malinga ka lihia Rundi. Samantaro, dua tangan Rundi mamaluak mesra pinggang Yanti. Nan kato alah baganti dasah, nan dasah alah batuka jo mabuak. Mabuak dek ulah rayuan setan nan makin tenggen manggoda duo insan ko.

Indak lamo sudah tu, Rundi mahangkek batang tubuh nan putih barasiah jo sagalo kaayuan dunia nan mambuek Rundi tapikek. Wajah Yanti memang wajah nan indak ka bosan-bosan dipandang mato.

Batang tubuh tu kini tergoleh bagai sepotong puisi di bulan nan balah duo. Urang tu kini laruik dalam simponi saketek mangecek banyak kaarajo. Mangarincang malam jo birahi lia!
Di saat Yanti laruik dalam dasah, nan Ijah panuah jo darah.

Samantaro, Dirga manunggu pulo jo babagai rancana ka mungko. Rancana ka manjadi calon Gubernur Sumbar 2024. Dan, salah satu kuncinyo adoh di tangan Rundi!
(Episode Satu Tamat; Tunggu Episode Selanjutnya)