”Pacar Lamo” (Episode 130)

18
Pinto Janir

Walau kaie nan ka dibantuak tapi ikan dilauik nan dihadang. Lai ko lah paham Rundi bahaso apo nan dilakukannyo ko barisiko tinggi tahadok kautuhan rumah tanggonyo. Alah inyo siap jo kahancuran rumah tanggo nan lah dibina batahun-tahun.

Alah ko lah inyo siap babagi raso, antaro Ijah jo Yanti. Alah ko lah inyo sabana-bana siap babagi demi pacar lamo , sudah tu mangorbankan perasaan anak-anaknyo surang.
Adaik rindu adolah batamu. Adaik salingkuh adolah kicuah.

Main aia basah. Main api tabaka. Main mato sela. Main cido galia. Hiduik ko iyo main-main. Tapi, ijan dipamainkan bana. Bamain-main di galombang gadang, sudah tu manari di ateh badai, itu samo se jo uwia-uwia mintak gatah.

Plato pernah mangecek, satiok urang manjadi panyair kalau lah tasantuah dek ulah cinto. Rundi bukan panyair. Inyo ayah dek duo urang anak. Inyo lah punyo bini. Manga juo lai balaruik-laruik jo kisah lamo. Nan alah balalu, lupokanlah.

Tapi, iko bana nan indak mampu dilakukan Rundi, malupokan Yanti. Sajak dulu hinggo kini, Yanti se nan adoh dalam paruik, dalam pangana, bahkan dalam gumam. Maaf, nan inyo gauli Ijah, nan inyo kana Yanti.

Makonyo jan heran kalau anak padusi Rundi nan si Suci tu, wajahnyo labiah dakek ka wajah Yanti katimbang wajah Ijah. Baitu pulo halnyo, almarhum Didit anak surang Yanti, ireh-ireh mungkonyo labiah dakek ka ireh-ireh wajah Rundi katimbang wajah laki Yanti nan alah almarhum pulo.

Dek karano indak adoh parsiapan ka manginap, urang tu lalok mamakai baju nan inyo pakai tu juo. Yanti paliang indak bisa lalok kalau indak mamakai daster. Rundi baitu juo, inyo indak bisa lalok kalau indak mamakai piyama.

Nan dilakukan urang tu adolah marabahkan badan di kasua untuak baduo tu. Rundi marabahkan badan di tapi kida tampek tidua tu. Yanti di ujuang suok. Adoh sakitar satangah dapo jarak urang ko.

”Da, indak namuah lalok mato Yanti doh kalau lampu tu tatap hiduik. Matian se lampu gadang tu Da. Pakai sajo lampu lalok nan tun ha,” lambek kato Yanti bakato ka Rundi sambia manunjuak lampu lalok nan talatak di nakas kamar tu.

Rundi indak manjawek. Inyo lansuang baranjak mancari patik lampu. Lampu gadang mati, lampu lalok hiduik. Cahayo di kamar tu barubah manjadi ramang-ramang. Sudah tu, Yanti diam. Rundi diam.

Baca Juga:  ”Pacar Lamo” (Episode 151)

Yanti baupayo mamiciangkan mato. Rundi baitu pulo. Mato panglihatan tapiciang, tapi mato hati tabukak. Judulnyo, mirip lagu pop Minang, mato lalok hati batanggang.
Sakali-sakali, Yanti malengoh ka Rundi. Rundi baitu pulo.

”Da.. indak namuah lalok mato Yanti”

”Picianganlah…!”

Dek karano Rundi manjawek, piciangan, otomatis Yanti lansuang se manutuik an matonyo bantuak urang ka lalok bana. Apokoh Rundi lai tahu bahaso dado Yanti sadang kareh bagamuruah? Sabaliaknyo, apokoh Yanti lai tahu pulo bahaso jiwa jo raga Rundi sadang galau juo?

Batang tubuh Yanti adolah sasuatu nan samparono bana. Nan bahkan labiah indah daripado sapotong puisi penyair kelas dunia. Katikok Yanti mamciangkan mato, saat itulah Rundi mamandangi wajah pacar lamonyo ko jo sagalo raso.

Cantiknyo banyak. Ayunyo balabiah. Kameknyo tacurah. Hiduang mancuang. Rambuik tagerai. Sirah pulo saangin. Jangek tacilak. Mato rancak. Aromanyo khas. Wangi tanpa parfum. A juo lai. Samparono. Sudahlah rancak, bapitih pulo. Anggun.

Ondeh Mak oi.

Tiok laki-laki nan mancaliak, banyak mandacak, pado nan indak.
Kini, padusi rancak ko rabah jo mato tapiciang dalam jarak sadapo dari Rundi.
Rundi baitu pulo. Papa muda nan ganteng. Urang ko, bantuak pinang dibalah duo.

Pas katikok Rundi maamat-amati wajah pacar lamonyo ko, Yanti mambukak mato. Saliang pandang juo baru.

”Adoh apo Rundi?” sendu kato nan kalua dari muluik Yanti.

Rundi manjawek jo senyum.

”Adoh nan salah Da?” eee…Yanti ko kadang ba Rundi se kadang ba uda. Sajak partamuan tadi, sabutannyo ka Rundi baganti batuka, kadang ba Rundi kadang ba Uda.

”Adoh!”

”Apo, Da. Tolong sampaikan…”

”Nan salah adolah takdir!”

”Takdir? Mungkasuik Uda ba-a?” Yanti manggaliak sambia sangenek manggeser laloknyo ka arah Rundi.

”Ba a kok takdir indak bapihak ka awak?”

”Mungkasuik Uda?” Yanti manakan nada ngeceknyo agak mandalam, sambia manggeser badannyo nan makin dakek ka Rundi.

”Yanti, jodoh bukan salamonyo baarti cinto. Baruntuanglah urang-urang nan bajodoh jo urang nan dicintoinyo!”

Yanti tadiam. Inyo indak paralu banyak tanyo. Inyo paham, apo nan dimungkasuik an Rundi. Badannyo makin inyo dakek an ka Rundi. (Basambuang)