”Pacar Lamo” (Episode 79)

3
Pinto Janir

”Iko bukan soal baok-mambaok Ngah. Nan ambo tahu tantang Etek Jariyah ko, liau urang suluak. Urang lah lamo marando….,” Rundi bakato ka Angah Alim nan tampaknyo sangaik yakin kalau Greno kanai gayuang dek lawan Rundi.

Rundi lah diagaih tahu, alah ditunjuak an jalan kalua, tapi mambantah juo. Itu pulo salahnyo. Apo salahnyo, inyo paturuik an se dulu saran Angah Alim untuak mambaok Greno barubek ka Etek Jariyah.

”Kini baitu se lah. Wa ang ingin anak ang cegak atau indak?”

”Sia pulo nan tahan mancaliak anaknyo sakik Ngah. Ambo, tantu ingin bana kalau Greno sehaik. Indak tahan lo ambo mandanga pakik anak ambo tu doh Ngah. Anehnyo, pakiknyo ko tibonyo taruih se pas katikok hari mugarik tibo!”

”Ha, tu nyo. Itu sabuah tando. Anak ang ko kanai!” kato Ngah Alim, ”Bilo wak pai?”

”Apo ndak bisa kalau Etek Jariyah ko kito japuik sajo Ngah?”

”Sapangatahuan ambo, liau susah maajaknyo pai. Kalau ka mintak tolong, harus awak nan pai ka suraunyo!” kato Angah Alim pulo.

”Kalau baitu, cubo ambo pikia-pikia dulu Ngah. Ambo sampaikan dulu ka Ijah….,” kato Rundi ka Angah nan marupokan kakak sapupu dek amak Rundi.

”Sumbarang wa-ang lah. Tapi, jan lamo bana bapikia. Taniayo anak bujang ngenek ang tu bekoh,” tageh suaro Angah Alim.

”Kini, ambo pulanglah dulu. Salam ambo ka urang rumah wa-ang…..!”

Dek karano, Angah Alim ka pamit pulang, mako Rundi mahimbau Ijah nan sadang bakameh-kameh manyaterika baju di kamarnyo.

”Ijah…Ijah…..Oi Ijah,” rabik Rundi. Dari dalam kamar Ijah manjwek sambia bagageh kalua:

”Yo Da!”

Baitu Ijah kalua kamar, Rundi bakato: ”Angah ka pulang lai!” Ijah maangguak ka arah Angah. Sudah tu disalaminyo Angah.

”Hati-hati di jalan Ngah!” kato Ijah.

Sabalun pulang, Angah babisiak ka Rundi: ”Wa ang agiah tahu lah urang rumah wa-ang. Hubungi Angah, bilo kadibaok Greno ka tampek Etek Jariyah!”

Sudah tu, Rundi mahangkek tubuah Greno nan takalok di sofa ruang tangah tu. Dipindahkannyo Greno ka kamarnyo surang.

”Bia Ijah mangawanan Greno lalok di kamarnyo ko yo Da!” kato Ijah ka Rundi.

”Ndak usah. Greno lah aman tu mah. Ijah lalok di kamar awak sajo….!” (Basambuang)