”Pacar Lamo” (Episode 109)

9
Pinto Janir

Kalau hatilah dikincah cinto, indak ka adoh badai nan talampau gadang sarato indak adoh lawik nan baombak gilo. Indak adoh langik nan talampau tinggi, indak adoh pulo rimbo nan talampau galok.

Kalau cinto jo rindu lah mambaro, lah batungku basangai raso, pilihannyo ciek se nyo. Indak adoh jurang nan talampau dalam untuak dihambuan. baitu carito cinto. Mari kito uji cinto Rundi.

Laikah sasuai kareh hati jo kanyatoan. Jan sampai hati kareh paruik badampuang. Lai talok deknyo mahambua? Ka Padang untuak puta kapalo. Manamui Yanti nan dirindu. Lai indak rindu di muncuang sajo.

”Yanti, Rundi ka Padang kini!”

”Serius?”

”Tunggu se lah. Minimal manjalang Ashar Rundi tibo!”

”Yanti tunggu!”

”Dima?”
”Lansuang se ka rumah di Asratex”.

”Oke!”

Telepon ditutuik Rundi.

”Assalamualaikum”

”Waalaikum salam”

”Sampai jumpo!”

”Hati-hati di jalan”.

Baitu salasai bakato jo Yanti, Rundi lansuang mahubungi Ijah. Sakali talepon badariang, Ijah lansuang mahangkek.

”Yo Da…!”

”Ijah, Uda adoh acara mandadak di Padang. Manjapuik kawan dari Jakarta!”

”Sia tu Da?”

Ondeh Mak, indak biaso-biasonyo Ijah batanyo takah itu. Biasonyo Ijah maamin senyo. Kini batanyo pulo, ”Sia tu Da?”

Baca Juga:  ”Pacar Lamo” (Episode 151)

”Kawan….!”

”Kawan mano?”

”Kawan bisnis!”

”Laki-laki atau padusi!”

Mandanga Ijah batanyo model iko iyo agak tasingguang Rundi.

”Ijah…..!” lambek suaro Rundi, tapi mananak, ”bantuak curiga Ijah jo Uda. Apo indak adoh saliang picayo lai di rumah tanggo ko?”

Ditanyo baitu, Ijah tadiam. Tasadu jantuang hatinyo. Bukannyo Ijah indak picayo, adaik kabanyakan padusi kalau lah takanai sakali, sulik malupokannyo. Daya ingek padusi ko akan kuek ka hal-hal nan malukoi hatinyo.

Banyak padusi paliang dandam kalau soal manyimpan luko. Sulik bagi surang padusi manata hati nan lah pernah dikhianati. Ijah tahu. Apolagi, banyak kawan-kawan Ijah nan mulai baisiak suok kida soal hubungan Rundi jo Yanti, jo pacar lamonyo.

Salamo ko, bisiak-bisiak kawan-kawan tu diabaikan Ijah. Tapi, bisiak tu makin bakasan katikok Rundi manggigau manyabuik namo Yanti.

”Ijah indak picayo ka Uda?”

Sakali lai Rundi batanyo.

”Ba-a kok diam Jah? Indak picayo Ijah ka Uda?”

”Tasarah udalah…..!” baitu jawek Ijah. Jawek mano bukan caro jawek Ijah nan takah-takah dulu!

Praaaak. Talepon nyo tutuik dek Ijah. (Basambuang)