”Pacar Lamo” (Episode 111)

13
Pinto Janir

Nan paliang rumik dalam hiduik ko adolah mamiliah. Mamiliah ciek di antaro duo. Apolagi kalau, duo-duonyo tu raso ka sero. Duo-duonyo tu raso ka tapek. Duo-duonyo tu raso ka indah.

Katikok badan diri disuduik an jo ciek pilihan di antaro duo, nan biaso tajadi adolah gamang jo bimbang. Anggau jo ragu. marumeh jo mamiuh. Badampuang jo bagampo.
Kajian apo ka dipakai? Kajian logika?Kajian Raso. Kalau tagak di logika, cangguang di raso.

Tagak di raso, goyang di kiro-kiro. Kalau takah iko, apo ukuran bantindak di nan bana, di nan bijak, di nan tageh sahinggo alu tataruang patah tigo, samuik tapijak indak mati. Iko akibaik mampaturuik an hawa napasu.

Pacah paruik dibueknyo. Sahinggo, bacakak lahia jo bathin basalisiah muluik jo hati. Padohal, kabuik lah agak mulai tarang, hujanlah agak mulai taduah, nan hilang patuik dicari nan cabiak patuik dijaik, nan luko patuik diubek i.

Padohal, suasana alah mulai mambaik. Kaadaan lah mulai baansua-ansua puliah. Sabananya, manga pulo Rundi harus ka Padang. Apo juo lai, lupokan se lah pacar lamo tu. Alah wakatunyo bagi Rundi untuak kumbali mampaelok i rumah tangganyo baliak.

Tapi ba-a lah, tabayang dek Rundi Yanti jo urang lain, parasaannya lansuang bakacamuak. Raso kabarek dilapehkanRaso ka sulik dielakkan. Rundi sabana-bana bak cando mangganggam baro.

Bahkan, Cimburunyo lansuang bantuak baro. Nyalo. Mambayangkan Yanti jo urang lain, inyo tak pulo rila. mambayangkan takah itu se alah askik hatinyo. Namun baitu, di sisi lain, inyo tak sampai hati pulo mangkhianati Ijah nan alah mambarinyo duo buah hati, Greno jo Suci.

Baca Juga:  ”Pacar Lamo” (Episode 151)

Apoko cinto ko sapantun jo lidah nan indak batulang, di mano kato gadang timbangan kurang? Aratinyo, untuak sabuah kaputusan cinto indak paralu bapikia sabalun babuek. Apo baitu? Jalani se dulu, di ma tibo sinan disiangi. Tibo di lawik diranangi.Tibo di badai, dihadangi. Tibo di jurang, haruskah ditajuni?

Cilako!

Kini ba-a lai ko ha? Haruskah inyo pulang dulu untuak maharagoi Ijah nan alah mamasak an inyo makanan kasukaannyo. Kalau Rundi indak manyempatkan diri pulang makan siang dulu, alamaik mangango luko jo raso kecewa dalam dado Ijah.

Bisa dipastikan, sakali ko Ijah iyo sabana-bana maraguak sadu. Tangih manikam ulu hati. Bak cando duri nan basijadi manusuak-nusuak hinggo tatulang. Iko nan mambuek Rundi cewang. Pulang dulu atau lansuang ka Padang? Pulang indak yo? Pulang? Indak? Pulang? Indak?

Iyo rumik kaputusan ko. Samantaro Rundi lah hampiang tibo di bateh kota antaro Bukiktinggi jo kabupaten Agam. Tapeknyo di Simpang Jambuaia. Indak lamo sudah tu, badariang talepon Yanti. Langsuang diangkek Rundi.

“Lah tibo di ma Rundi?”

“Baru kalua dari kota?”

“Hati-hati di jalan yo!”

Pas katikok tu, tibo pulo telepon Ijah. Lansuang pulo di angkek Rundi.

“Da, sabanta lai samba masak. Jam bara uda ka rumah. Makan siang se dulu di rumah sabalun ka Padang Da!”

Ondeh. Kalua paluah dingin Rundi.

Apo kadijawek?
(Basambuang)