”Pacar Lamo” (Episode 117)

10
Pinto Janir

”Lah tibo di ma Rundi,” lansuang se Yanti ka pertanyaan inti. Pertanyaan tanpa basa-basi. Pertanyaan nan datang dari surang pacar lamo nan rindunyo mambangkak di hati. Bilo hati sadang rindu. Kalau pangana lah tatuju ka satu jiwa.

Di saat rago lah gali, raso lah sampai pulo, mako mananti manjadi kagalisahan . Sagalisah bulan basalimuik awan. Sagalisah malam arok balangik malam. Pado saat tu, antaro rindu jo galisah, antaro taragak jo rasah, manjadi sasuatu nan indah.

Manjadi sasuatu nan ditunggu-tunggu. Pacah dado kanai tutuh, sakiknyo dapek ditahan. Namun, pacah dado dek ditutuah rindu, apo padanannyo?

”Rundi, lah sampai di ma?”

Rundi sangajo diam. Antah apo pulo mungkasuiknyo.

Indak dapek diagak, kadang rindu ko manjadi panyakik kalau tak basuo. Manjadi ubek kalau apo nan diarok manjadi nyato sasuai jo apo nan taraso-raso. Raso-raso indak ka sampai Rundi tibo.

Raso-raso lamo wakatu bajalannyo. Raso-raso antah ka basuo atau antah tiado. Rindu ko kalau dikubak-kubak bana, inyo iyo mirip ”antah” tu.

Baca Juga:  ”Pacar Lamo” (Episode 146)

”Rundi…!”

Sakali ko sigap Rundi manjawek. ”Yoooop !”

”Lah tibo di ma kini?”

”Lubuakbuayo!”

”Kok lamo na sampainyo ?”

”Iyo, tadi adoh macet di Lubuakbuayo….”

”Macet dek apo?”
Rundi diam. Inyo indak namuah manyabuik an macet dek adoh kecelakaan. Inyo tahu, kalau kato-kato kecelakaan disabuik-an tantu akan mambuek Yanti takana ka peristiwa kecelakaan yang dialaminyo dulu.

Makonyo Rundi diam sajo. Indak namuah manyabuik, macet dek karano kecelakaan nan mambaok maut. Antaro, mahasiswi nan mamakai motor jo karatepi. Mahasiswi tu maningga di tampek. (Basambuang)