Tigo kali Yanti manelpon, tigo kali tu pulo ditulak telpon tu dek Rundi. Indak konsen inyo manarimo talepon Yanti di mungko Ijah jo di mungko duo anaknyo. Inyo sadar, bahaso hubungannyo dengan Yanti adolah hubungan nan indak lazim. Hubungan nan indak pado tampeknyo.
Sangajo Rundi tak mahubung-hubungi Yanti sajak babarapo lamo ko. Itu untuak apo? Untuak mayakini diri bahaso inyo alah punyo keluarga. Inyo alah punyo Ijah. Indak adoh satu pun kasalahan Ijah salamo inyo mambina rumah tanggo. Sabagai bini, layanan Ijah; pas. Indak talabiah. Indak balabiah. Indak takurang. Indak bakurang.
Apo alasan Rundi mangkhianati Ijah? Indah adoh doh. Lah dipikiaan bana dalam-dalam dek Rundi, indak tasuo alasan tapek untuak malukoi hati Ijah. Apolagi katikok anaknyo Greno sakik, tasadar Rundi.
Sajak babarapo malam ko, acok Rundi mamandangi wajah bini katikok sadang tidua. Baitu polos jo baitu manih wajah bininyo. Acok Rundi diam-diam mamaluak Ijah di tangah malam. Acok Rundi diam-diam mamelok i salimuik Ijah nan tasimbah.
“Da….!” Ijah mangajuik an lamunan Rundi.
Tanyato Rundi alun juo turun dari ateh otonyo laid oh. Baitu inyo turun, Suci, si bungsu lansuang balari mangaja Rundi. Lansuang mintak didukuang. Samantaro Greno, bagayuik ka baju Rundi. Bahagia, tampaknyo Rundi.
Bahagia?
Kok disabuik bahagia, ragu wak. Sabab, Rundi alun sapanuahnyo bisa malupokan Yanti. Nan baru bisa inyo lakukan adolah balupo-lupoan badan. Bantuak, bantuak ka lupo bana. Tapi, jauh dari lubuak hati nan paliang dalam; Rundi tarumuak.
Inyo kini sadang bacakak jo hati surang. Satiok bayang-bayang Yanti tibo, inyo lengah-lengahkan. Kalau raso taragaknyo ka Yanti mambangkak, terapi nan inyo lakukan adolah mamesrai Ijah.
Kalau bayang-bayang Yanti makin jaleh jo makin tarang di ruang matonyo, mako inyo alihkan pangananyo tu jo caro bacinto manih jo Ijah. Makin kancang bayang-bayang Yanti, makin kancang pulo Rundi bacinto gilo jo Ijah.
Kadang-kadang Ijah heran, frekuensi bacinto Rundi persis takah urang baru-baru. Takah malam-malam partamo dulu. Kacau Rundi ko. Lah babagai ragam terapi inyo lakukan. Tiok malam mamandang bini sadang lalok.
Tabayang wajah Yanti, Ijah juo nan marasai. Tapi, Ijah indak maraso bahaso balabiahnyo frekuensi hubungan bacinto ko dek karano “palarian” Rundi. Untuang se kemesraan nan dilakukan Rundi tu masih natural. Masih takesan manih. Walau sabananyo, kalau Rundi bajujur-jujur jo perasaan inyo surang; itu palasu.
“Da…jadi uda mahantakan Zalmi sampai ka kuburan !”
Partanyaan Ijah ko mangajuik an lamunan Rundi. (Bersambung)
