Baik Rundi ataupun Yanti, samo-samo barek kalua dari penginapan tu. Kalau buliah kandak balaku, maunyo urang ko, kok dapek baduo sapanjang maso. Ha, baduo? Nan Yanti jadilah. Nan Rundi ba-a? Rundi baranak. Rundi babini. A lai?
Cinto?
Kalau bicaro soal cinto, iyo rumik. Indak tantu apo nan kadijawek lai. Kalau sesuatu alah bahadok-hadok an jo cinto, pado saat tu tasuo juo bunyi kato, di ma katibo se lah lai.
Baralah ka banyak urang tagalincia dek ulah main api.
Dek ulah salingkuah. Dek ulah mampaturuik an raso nan bagamuruah, lupo jo badan diri nan ka kanai tutuah. Sagalo parsoalan, tibo manutuah. Tibo timpo batimpo.
Bara banyak urang nan sangsaro dek ulah tadayo rayan-rayan pacar lamo? Banyak!
Namun baitu, Rundi indak lo salah doh. Inyo manusia biaso nan cintonyo sajak dulu hinggo datiak kini ko hanyo pado Yanti surang. Ijah ba-a? Ijah hanyolah jodoh bagi Rundi. Rundi yakin bana, jodoh bukan salamonyo baarti cinto, tapi bahagialah urang nan bajodoh jo cintonyo nan surang.
Lambuik!
Jadilah. Wak caliaklah kini sampai di ma bana nyali si Rundi, atau Rundi ko bagian dari laki-laki gadang sarawa. Hati kareh, paruik badampuang. Kini Rundi jo Yanti lah ampiang tibo pulo di Bunguih.
Tapi adoh carito, adiak sapupu Ijah nan kuliah di UNP tanyato siang ko sadang manelpon Ijah pulo. Bantuaknyo adiak sapupu si Ijah ko panasaran bana satantang Rundi nan dicaliaknyo pai jo anak gadih urang.
Anak-anak Rundi ka sepupu Ijah ko ba Tektih alias Etek Putiah. Dek karano kulik Tektih ko putih. Ijah ba-Tektih lo kainyo.
Manelpon si Tektih ko.
Kini ko sakali manelpon, diangkek dek Ijah. ”Assalamualaikum Ni,” sapo Tektih.
”Waalaikum salam Tektih, tumben manelpon Tektih ko. Adoh apo Tih?” tanyo Ijah.
”Ndak adoh apo-apo Ni. Lai sehat-sehat se Ni?”
”Alhamdulillah, Tektih!”
”Greno jo Suci ba-a kabanyo Ni?”
”Alhamdulillah, sehat-sehat sajo!”
”Oh yo Ni, adoh Da Rundi Ni?”
”Adoh apo tu Tih? Uda Rundi di Padang?” Alun sempat Tektih batanyo Rundi di mano, Ijah lah manjawek bahaso Rundi di Padang.
”Adoh acara apo Da Rundi di Padang Ni,” tanyo Tektih. Sabananyo, adoh perasaan indak lamak Ijah katikok adik sepupunyo ko batanyo di ma Da Rundi. Indak biaso-biasonyo Tektih batanyo tantang Rundi…
”Ragu awak Ni. Patang sore awak raso-raso batamu jo Da Rundi…..,” agak lain nada mangecek Tektih tu. Saat tu, darah Ijah lansuang se badabok-dabok kareh. (Basambuang)
