”Pacar Lamo” (Episode 20)

27
Pinto Janir

Palukan Rundi marasuak ka raluang-raluang hati Ijah nan paliang dalam. Indak tahu awak, apoko Rundi mamaluak bininyo jo kasiah sayang, jo rindu atau jo hasrat normal seorang laki-laki? Atau hanyo untuak sakadar malampiaskan napsu samato?

Indak. Indak baitu bana doh. Rundi indak sajaek tu bana. Rundi ingin bacinto. Ingin bana bacinto, tapi indak dalam angan-angannyo nan tatap dihantui dek bayang-bayang Yanti.
Rundi baupayo, manyaru kasiah. Manyaru jiwa.Manyaru sayang ka bakeh bininyo; Ijah.

Tiok bayangan Yanti datang dalam pangananyo, makin inyo cubo manapiah. Rundi mambathin, mambana wak Nti, pail ah dulu. Co itu bana caro Rundi mahapuih bayang-bayang Yanti di saat inyo sadang ingin baduo jo Ijah.
Rundi mampaarek rangkuhannyo ka Ijah.

“Uda…..,” manggaretek suaro Ijah.

Sudah tu Ijah mambaliak an badan. Nyo suruak an kapalonyo di dalam dado Rundi. Panuah kasiah sayang, Rundi mausap rambuik Ijah. Bakali-kali Rundi manyayang Ijah. Nyo banamkan dek Rundi hiduangnyo ka ubun-ubun Ijah.

Diam-diam, laki-laki ko tasadu dalam hati. Timbua ibonya ka Ijah. Tapi, walau baitu, inyo indak pulo bisa lapehkan Yanti. Ijankan malapehkan Yanti, manapiah bayangan Yanti se inyo sulik.

Makin dalam Rundi manciumi Ijah. Diubun-ubun Ijah, Rundi mangucap. Dalam hati, inyo bacokan alfatihah. Katikok Rundi mambacokan Alfatihah dalam hatinyo, Ijah marasokan suatu katanangan. Suatu kadamaian. Ijah manariak napas dalam-dalam.

Tangan Rundi makin pasti mamaluak tubuah nan sadang rindu ka laki. Tabayang dek Ijah, katikok malam-malam partamo jo Rundi. Tabayang dek inyo, sikapnyo nan malu-malu. Tabayang dek inyo, bapasrah diri katikok Rundi melaksanakan tugehnyo sebagai suami; sebagai laki-laki.

Baca Juga:  Pemerintah Pusat Tidak Anaktirikan Sumbar dalam Pembangunan

Sudah tu, Rundi dalam sebuah kemesraan nan elok, maangkek batang tubuh bininyo ko, Ijah mamajamkan mato. Indak sanggup Ijah mamandang matro Rundi nan tajam, tapi taduah.

Nyo taruah elok-elok tubuh bininyo tu ka ateh tampek tidua. Nyo pandang lamo-lamo. Ijak masih manutuik an matonyo. Ijah hanyo siap.Siap untuak laki.Siap untuak urang nan dicinto.

Katikoki Ijah mambukak mato, Rundi masih tatap mamandang bininyo. Nyo pandang dari ujuang rambuik sampai ujuang ka kaki. Ijah, nyaris samparono.

“Uda…jan takah itu mancaliak Da….malu Ijah ha…,” kato Ijah marajuak manjo sambia mangambangkan tangannyo seolah-olah mintak dipaluak dek Rundi. A juo lai. Rundi mamburu Ijah.

“Kasa uda mah…..,” kato Ijah katikok tarasonyo dek inyo bahaso Rundi talampau banafsu.

Irama nafas Rundi lah ndak elok. Wajahnyo lah angek. Baitu pulo Ijah. Kecek urang, sayanglah bini jo raso jo parasaan nan paliang dalam. Nikmati percintaan nan tun jo raso haru. Munculkan sagalo rindu.

Munculkan sagalo kasiah. Munculkan sagalo sayang. Tak usah taburu-buru. Nikmati sajo tiok detik jo tiok jangka. Nikmati dalam raso. Ijan nikmati dalam salero. Manikmati sasuatu dalam salero, capek habisnyo. Capek salasainyo.

Rundi mahambiak jamari Ijah. Nyo sayang jo panuah kasiah dalam hidu nan indah.
Hanyo sesaat Rundi bana-bana maraso bacinto jo Ijah, pado saat kamudian, bayang-bayang Yanti lalu di hadapannyo. Bayang-bayang tu tibo bak baurai mato….

Sssssss…Konsentrasi Rundi lanyok. Otomatis palukannyo lapehkan. Ijah tasadu…. (Basambuang)