Kalau diingek-ingek, banyak lucunyo kisah awak tu yo Rundi!” kato Yanti sambia basanda ka bahu Rundi nan sadang mambaok oto. Tibo-tibo talepon Rundi badariang.
Di layar HP tatulih namo: ”Ijah Mamanya Anak-anak.”
Sakali. Duo kali. Pas katigo kali, talepon badariang, Yanti bakato: ” Angkeklah. Bagaimanapun juo, inyo urang rumah Rundi. Ijah tu ibu dari anak-anak Rundi!”
Sabananyo Rundi rishi mahangkek talepon Ijah di dakek Yanti.
”Jaweklah se lah…indak ba-a ba-a bagai doh….!”
Katikok Rundi ka mahangkek, talepon tu alah taputuih….
Indak lamo sudah tu, talepon dari Ijah badariang baliak!
Ijah makanan kicuah nan Yanti makanan maso lalu. Sabana rumik tampek tagak Rundi. Nan iko bini, nan iko pacar lamo. Perasaan mano nan ka ditenggang. Kok kadiangkek talepon Ijah di mungko Yanti, tantu isi kato adolah kicuah.
Kok indak dijawek, ba-a perasaan Ijah? Tantu hati Ijah bakato-kato dibueknyo. Hati bini mano pulo nan ka indak bakato katikok laki nan dicinto indak bakaba barito. Nan paliang mambuek parasaan surang bini manjadi galau adolah katikok laki indak tahu di ma tampeknyo barado.
Iko alah sahari Rundi indak mahubungi Ijah mah ya. Patang malam, Ijah indak bisa mamiciangan mato. Inyo sapantun bana jo mato lalok hati batanggang. Tiok sabanta tasintak. Tiok sabanta baguliang ka suok ka kida.
Bahkan, katikok Ijah tajago tu, tibo-tibo jatuah cacak dari ateh loteng. Tepek di ujuang kakinyo. Untuang Ijah indak kepo-kepo bana mancari makna atau apo primbonnyo kalau cacak jatuah di mungko awak.
Kalau kecek urang gaek-gaek dahulu, kalau adoh cacak jatuah di mungko awak, itu aratinyo sabuah tando bahaso awak akan kahilangan urang nan disayang. Kalau cacak jatuah tu manimpo batang tubuh awak, manuruik sabagian kapacayoan urang, itu sinyal atau simbol atau patando bahaso urang nan awak sayang akan mangalami kajadian buruk.
Sadangkan dalam kaparcayoan agamo Islam, cacak disunahkan untuak dibunuah karano cacak ko binatang nan dianggap fasik nan dapek mambarikan dampak buruak bagi bakeh diri manusia.
Salain makna di ateh, kajatuhan cacak nan manganai batang tubuh awak dipradiksi bahaso awak akan batikai atau batangka jo pasangan atau kawan awak. Kecek urang-urang gaek taduhulu lo ko heh, caro mahindari diri dari kesialan kajatuhan cacak ko adolah, tuka baju nan kanai cacak tu lakeh-lakeh.
Sudah tu maludah tigo kali ka suok, tigo kali ka kida. Rantakkan kaki sabanyak tujuh kali pulo ka tanah. Jan kareh-kareh bana, cayia pulo tumik tu bekoh. Tapi itulah salahnyo. Ijah kan indak tahu doh apo makna kajatuhan cacak.
Nan jaleh, malam katikok Rundi jo Yanti mangamar di sabuah kotek di kawasan Mandeh tu parasaan Ijah gamang-gamang cameh. Inyo indak tahu, apo nan mambueknyo gamang nan apo pulo mambuek inyo cameh.
Sabananyo iko alah naluri surang bini mah. Nan mambuek inyo gamang jo cameh tu adolah katikok inyo kahilangan Rundi.Katikok lakinyo baraliah raso ka pacar lamo. Katikok inyo jo anak-anaknyo hiduik tanpa Rundi. Katikok inyo mambayangkan, kalau Rundi maninggaan inyo tanpa tangguang-jawab ka anak-anak.
Kagamangan Ijah tu adolah kagamangan manusiawi. Kagamangan surang bini nan indak bisa manga-manga. Ijah talatiah dimanjokan Rundi. Talatiah, sagalo adoh. Talatiah, apo nan dibutuhkan apo nan tasadio. Salamo nan ko sagalonyo, Ijah tahu beres.
Indak pernah mamikiakan, ekonomi rumah tanggo. Nan tugehnyo adolah mangasuah anak jo malayani laki. Hanyo itu sajo. Memang perasaan Ijah mulai sabana tak lamak katikok Rundi manggigau manyabuik-nyabuik namo Yanti.
”Yanti…Yanti…Yanti !”
Ngiang-ngaing gigau Rundi ko nan mahantui hari-hari Ijah, sampai kini. Sampai taleponnyo nan alun juo diangkek Rundi, hati Ijah bakato-kato surang. Samantaro Rundi mancari celah untuak ba a caro manelpon Ijah di balakang Yanti.
Inyo cari alasan, untuak saolah-olah baranti sarapan pagi di sabuah kadai ! Sudah tu baru inyo talepon Ijah… (Basambuang)
