Ujang Kutuik ko sangaik disayang dek urang-urang tuo di Gunuangpangilun. Apo sabab? Partamo, Ujang Kutuik ko panamuah. Disuruah marambah parak namuah juo. Disuruah manjek tang kambia, ligat gaya panjeknyo.
Pokoknyo apo nan disuruah, apo namuah. Jaih Pakuak, anak tungga babeleang. Laki-laki pamaleh gadang. Disuruah pai sikolah, nyo pai main lubang. Mungkasuiknyo, bataruah jo pitih koin nan dimasuak an ka lubang. Atau, main ampok dindiang. Disuruah mangaji, nyo duduak di lapau. Indak adoh nan beres kalakuan Ijaih Pakuak ko doh.
Sudah tu, dari ngenek-ngenek, Ijaih Pakuak ko pacakak. Jurus nan inyo baok kalau sadang bacakak adolah jurus helikopter. Alias, jurus malayangkan tinju bantuak baliang-baliang helikopter. Ijaih ko hobinyo bacakak. Dalam soal bacakak, inyo indak pernah mangalah.
Kalah kini, bisuak ulang liak. Sudah tu, inyo pambae rumah urang jo batu. Lah gadang snek, Ijaih main ka pasa jauh atau Pasa Raya. Teorinyo snek se nyo. Katikok inyo ingin marabuik lahan parkir, inyo ongkok-ongkok i urang bagak tu, sudah tu nya tapoh dari balakang.
Pernah masuak panjaro satahun dek gara-gara, inyo mamakuak lutuik preman pasa. Sampai kini, tak balutuik pareman nan nyo caca jo ladiang maja tu. Lumpuah urang inyo buek saumua hiduik.
Tapi, ka urang asli Gunuangpangilun, Ijaih ko indak barani samena-mena. Inyo tahu, urang asli Gunuangpangilun ko kompak. Kanai ciek, kanai sadonyo. Tapakiak ciek, tapakiak sadonyo. Iko nan mambuek Ijaih Pakuak gamang mambuek caruah di kampuang ko.
Tapi, soal Ijaih mamalak urang lain, tu soal inyo tu. Soal pribadi. Urang Gunuangpangilun ko indak suko ikuik campua mauruih urusan urang lain doh. Asal lai indak manggaduah ka inyo, taruihlah!
Kok dapek, bagi-bagi lo stek. Ijaih catuak mandapek, kopi pareman sa lapau perai.
Sudah tu, suko-suko Ijaih pakuak se lah lai. Tamasuak, ka mamakuak Gusnick. Ijaih ko pakuaknyo indak lo pakuak-pakuak ambu-ambu doh, tapi pakuak-pakuak bada. Walau pakuak-pakuak bada, kalau dikumpua-kumpua, nan bada tu bisa satinggi bukik tu mah, ndak.
Nyo lah tibo di muko pintu. “Segala naik sekarang. Roti ambar naik. Selai naik pula. Minuman kaleng, tak bersiagak naiknya,” kecek Ijaih pakuak mancaliak ka arah Gusnick nan manarimo jo galak negnek se. Wakatu tu, babisiak molah si Zal Rabiak.
“Bara baliak pitih Jaih?”
“Pas….!” jawek Ijaih sambia mangisai-ngisai sakunyo, saolah-olah sakunyo tak barisi.
Sudah tu, Gusnick batanyo soal ba a mulo kajadian nan ko.
“Iyo balangga, ba-a juo lai !” manyorong se Ijaih tak baradaik ko.
“Balangga? Apa itu?” tanyo Gusnick.
“Begini ha… begini ha,” kecek Ijaih sambia mahadu-hadu duo tenjunyo, “Belanggar!”
“Tabrakan !” solo Zal Rabik.
Ciek duo urang Gunungpangilun ko lah mulai pulo tahu bahaso Rundi tu adolah pacar lamo Yanti. Yanti ko pai ka Bukiktinggi manuruik Rundi untuak mambicarakan soal bisnis. Adoh nan mangecek-an, Yanti ko ka tampek Rundi, bunyi kaba ka pai manikah. Baitu gosipnyo.
“Siapa Rundi? Pacar lama?” agak lain nada suaro Gusnick batanyo. Alis mato e tahangkek….Samantaro dari Bukiktinggi Rundi handak siap-siap ka Padang! (Basambuang) Editor : Novitri Selvia